Luca De Clara

LucaDeClara_nuova1Luca De Clara al à cuarant’agns e al è a stâ a Codroip. Al insegne storie e filosofie tes scuelis superiôrs, si interesse di ricercje storiche e al colabore tant che gjornalist cu «la Vite Catoliche». Al à tacât a insegnâ par furlan tes scuelis elementârs dal distret di Codroip e te Universitât de Tierce Etât dal Friûl di Mieç viers la fin dai agns Novante. In chei timps si è inviade ancje la sô colaborazion decenâl tant che lematizadôr cul “Centri Friûl Lenghe 2000” pe redazion dal Gnûf Dizionari Bilengâl Talian-Furlan. Par Gaspari al à publicât tal 2001 Uomini o colpevoli?, un saç storic su l’ativitât dai tribunâi militârs talians te prime vuere mondiâl. Tal 2004 al à vinçût la 25e edizion dal premi leterari in lenghe furlane “San Simon” cul romanç Sul ôr dal jessi publicât di Ribis l’an dopo. Pe Kappa Vu al à voltât par furlan Animal Farm di George Orwell cul titul Il cjasâl dai animâi. Tal 2011 al è vignût fûr pe Forum il so ultin lavôr, Incontro ad Aquileia, une opare di divulgazion des teoriis di pre Gilberto Pressacco su la penetrazion dal cristianisim in Friûl. Sôs poesiis par furlan a son stadis publicadis timp indaûr su la gloriose riviste «Diverse lingue», direzude di Amedeo Giacomini. Al è stât assessôr a la culture dal comun di Codroip dal 2006 al 2011.